Ginahasa, Sinakal Umano Gamit Ang Sariling ‘Underwear’ Ng Biktima Ang Isang 10-Anyos Na Batang Babae,

MAYNILA, Pilipinas – Natagpuan ang bangkay ng isang batang babae na pinaghihinalaang ginahasa at sinakal pa ng mga salarin hanggang sa ito ay mamatay sa isang barangay sa Misamis Oriental nitong Martes, ika-19 ng Oktubre. Lumalabas sa imbestigasyon na pinagsamantalahan ang kawawang biktima na si Jamaica Marias Trion, Grade 5, at sinakal pa ito gamit mismo ang kaniyang sariling ‘underwear’.

Kaagad namang nahuli ang mga suspek na magkapatid na sina Ferlan Quiraban, 19, at Johnny Quiraban, 17; parehong residente ng Barangay Bal-ason, Gingoog City. Ayon sa ulat ng pulisya, pauwi umano ang bata mula sa paaralan noong Lunes ng hapon nang yayain ito ng magkapatid na mamitas ng prutas sa may ‘di-kalayuang bukid.

Magkakilala umano ang mga suspek at ang biktima na parehong residente ng isang sitio sa nasabing barangay.

Natagpuan ang duguang bangkay ng batang babae kinabukasan na nang umaga sa isang matalahib na lugar malapit sa pinangyarihan ng krimen. Wala na itong saplot sa katawan at pinaniniwalaang ginamit pa ng mga suspek ang sariling underwear ng biktima para sakalin ito.

Bagama’t itinanggi ng nakatatandang Quiraban na may kinalaman siya sa krimen, itinuro naman ito ng sariling kapatid na nagsabing siya lang daw ang humawak sa biktima habang ginagahasa ng kaniyang kuya ang bata. Ngunit ayon kay Police Inspector Marilyn Pimentel ng Gingoog City Police WCPD, lumalabas sa imbestigasyon na parehong ginahasa ng magkapatid ang batang babae.

Napag-alaman din na may ilang residente na nakakita sa mga suspek habang isinasagawa ang karumal-dumal na krimen at kaagad itong isinuplong sa may kapangyarihan. Agad namang nahuli ang mga suspek na nahaharap ngayon sa kasong rape at murder at ang nakababatang Quiriban ay nakatakdang i-turn over sa DSWD dahil sa pagiging menor de edad nito.

Iniimbestigahan din ng pulisya kung gumagamit ng ilegal na droga ang mga suspek dahil umamin ang batang Quiraban na isa siyang ‘runner’ ng shabu sa kanilang lugar.

Source: Bombo Radyo

SHARE THIS